Schon 2009 hat d’ lëtzebuerger Regierung iwwerluecht fir jonken Fraen Verhütungsmettel ze rembourséieren. De Gesondheetsministere huet elo confirméiert datt dëst ab dem nächsten Joer ëmgesat gëtt.

Den Zuelen vum Planning Familial no haten 2009 eng 245 Fraen ofgedriwwen. Dat selwecht Joer huet d’Regierung decidéiert dem Problem entgéint zewierken an huet den fräien Zougang zu Verhütungsmettel fir Fraen ënner 25 Joer an de Regierungsplang gesat.

Als Äntwert op eng Parlamentaresch Fro huet de Gesondheetsminister Mars di Bartolomeo e Méinden confirméiert, datt dëst nach ëmmer aktuell wier. Et hätt een eng Etude gemat a wei fern dëst realiséiert kéint ginn an krut elo gréng Lut vun der Gesondheetskeess. De Minister huet confirméiert datt de Projet ab 2012 a Kraaft trëtt. Och d’Gynekologen ginn mat abezunn esou dat d’Verhütungsmettel korrekt an och regelméisseg benotzt ginn. Doduerch sollen d’Besoin’en vun jonken Fraen ënner 25 méi berücksichtegt ginn.

Parallel zu dësem Projet ass och eng Sensibiliséirungskampagne iwwert d’sexuell Gesondheets an Schoulen an den Lycéen geplangt. Och kréien déi Jonk dann Informatiounen iwwert déi verschidden Verhütungsmettel an iwwert eng Ofdreiwung.